«Балашиха шәһәр судына Л.А.Долина вәкиленнән А.Н.Цырульниковага, Д.М.Льеонтьевка, А.И.Каменецкийга һәм А.Д. Основага карата 176 141 000 сум күләмендә зыянны каплау таләбе белән дәгъва гаризасы керде», – диелгән хәбәрдә. Суд дәгъва гаризасын карап тикшерүгә кабул иткән.

Исегезгә төшерәбез: Казаннан Артур Каменецкий җырчы фатирына бәйле мошенниклык турында эш буенча 7 елга катгый режимдагы колониягә (900 мең сумлык штраф белән) хөкем ителгән. Моннан тыш курьер Анжела Цырульникова – 7 ел колониядә утырачак, Дмитрий Льеонтьев – 7 ел махсус режимдагы колониядә (900 мең сумлык штраф), Андрей Основа – 4 ел гомуми режимдагы колониядә (900 мең сумлык штраф) җәза чарасы узачак.

16 декабрьдә Россия Югары суды Мәскәү үзәгендәге күчемсез милек тирәсендәге бәхәскә нокта куйган. Суд сатып алучы – Полина Лурьеның мөлкәткә хокукын раслап, Долинаның фатирда законсыз яшәвен таныган. Шуннан соң Мәскәү шәһәр суды җырчыга торактан чыгып китү бурычын куйган.

Фатир тирәсендәге ыгы-зыгы 2024 елда, Долинаның телефон мошенниклары корбанына әйләнүе мәгълүм булгач, башланган. Нәтиҗәдә ул фатирын саткан, әмма соңрак Хамовники суды алыш-бирешне гамәлдә түгел дип таныган. Бу карарны Мәскәү шәһәр суды һәм гомуми юрисдикциядәге Икенче кассация суды да раслаган. Ләкин Югары суд, аны инкарь итеп, Лурьеның милекче булып торуын таныган.